Organizado polo Centro de Novas Tecnoloxías de Galicia (CNTG) da Consellería de Economía, Emprego e Industria, o vindeiro día 27 de abril de 2016, de 16:30 a 20:30 horas, terá lugar nas instalacións do CNTG un seminario sobre servizo de rede baseado na identidade do usuario e as contornas de aplicación.

O seminario presentará aos/ás asistentes o servizo de rede baseado na identidade do usuario (IBNS, Identity-Based Networking Service) como tecnoloxía fundamental para a xestión de control de acceso de xeito centralizado nunha contorna corporativa.

O relator da xornada será Javier Novoa, doutor en Informática pola Universidade de A Coruña onde é profesor do departamento TIC na área de Telemática e imparte as materias de Redes en Enxeñería Informática e Seguridade de Sistemas da Información no Máster de Enxeñería Informática. Javier Novoa é colaborador habitual do Centro de Novas Tecnoloxías de Galicia e formador oficial do programa Cisco Networking Academy no que imparte cursos de CCNA routing & switching, CCNA security e CCNP. Posúe, entre outras, as certificacións de CCNA, CCAI, CCNA Security e CCNP

Obxectivos

Tras expoñer a arquitectura do servizo e como funcionan os protocolos RADIUS e 802.1x verase como implantar este servizo nunha rede corporativa e como utilizalo para mellorar o control  de acceso de usuarios dende diferentes orixes: LAN. VPNs de acceso remoto, redes sen fíos e xestión de dispositivos de rede.

Para rematar amosarase un caso práctico de aplicación onde se poderá observar este servizo en funcionamento.

As persoas interesadas que non podan desprazarse a Santiago de Compostela poderán inscribirse para seguir o evento a través de videoconferencia que se emitirá nas aulas CeMIT das seguintes localidades (iráse actualizando este listado no caso de que algunha aula máis solicite a súa participación)

1. Leiro
2. Pontedeume
3. Porriño, O
4. San Sadurniño

Temario

Servizo de rede baseado na identidade do usuario. Contornas de aplicación

    Introdución a IBNS

    Arquitectura

o   RADIUS

o   IEEE 802.1X

      Casos de aplicación

o   Control de acceso a xestión de dispositivos de rede

o   Control de acceso en redes sen fíos

o   Control de acceso en LAN

o   Control de acceso en VPNs de acceso remoto

      Caso práctico de aplicación