Desde o pasado día 4 de agosto, CeMITBetanzos conta con Axente TIC. Ao longo deste mes, cómpre facer o Programa de actuacións de inclusión dixital que se desenvolverá de setembro a finais de ano.
Nesta nova etapa da Rede CeMIT é obxectivo primordial “favorecer a inclusión dixital no ámbito de actuación contando co impulso e participación de diferentes colectivos sociais”. Por todo isto, invitamos a todos aquelas entidades sociais e/ou persoas, que o desexen, a que nos fagan chegar as súas propostas, suxestións, demandas... de cara a ofrecer actividades formativas axeitadas ás necesidades da poboación en xeral e en especial de aqueles colectivos con máis dificultades de achegamento ás TIC.
Asemade, informar de que calquera colectivo social pode solicitar as instalación da aula CeMIT co gallo de desenvolver actividades propias de carácter formativo, informátivo e/ou de divulgación.
A Rede CeMIT da Xunta de Galicia configúrase como o instrumento fundamental para promover a alfabetización dixital da sociedade galega. A Rede CeMIT ten como obxectivo potenciar actuacións relacionadas co desenvolvemento da actividade económica, empresarial e da implantación dos servizos electrónicos, titorizando a cidadanía con maiores dificultades e proporcionándolles os medios e ferramentas necesarios para poder formar parte activa da Sociedade da Información.
Para achegar as súas propostas, informarse das actividades e solicitar a Aula poden dirixirse a Aula CeMIT de Betanzos sito na R/ Emilio Romai, nº 1, chamar ao teléfono 981770011 ext 2401, ou enviar un correo electrónico ao enderezo: cemit.betanzos@xunta.es
Durante o mes de agosto a Aula estará aberta de Luns a Venres de 09:00- 15:00 horas.
Fonte: Axente TIC