A Rede CeMIT ofrece formación en ciberseguridade para un Nadal máis seguro

A Axencia para a Modernización Tecnolóxica de Galicia (Amtega), a través da Rede CeMIT, pon en marcha unha nova edición da formación “Un Nadal máis ciberseguro”, orientada a ofrecer á cidadanía pautas prácticas para afrontar con maior seguridade os riscos dixitais propios destas datas. A primeira sesión celebrarase o 28 de outubro na aula CeMIT de Ponteareas.

As accións formativas, cunha duración aproximada de hora e media, desenvolveranse en sesións de mañá ou de tarde en 25 concellos galegos. O obxectivo é facilitar recomendacións sinxelas para realizar compras en liña seguras, detectar páxinas web ou ofertas sospeitosas e identificar fraudes relacionados con promocións comerciais, sorteos, loterías, falsas mensaxes e outras estafas habituais durante o Nadal.

A formación prestará tamén especial atención aos xoguetes intelixentes e dispositivos conectados, achegando consellos para a súa configuración e uso seguro. Esta edición incorpora, ademais, novos escenarios de fraude, exemplos actualizados e recursos de consulta adaptados ás ameazas dixitais actuais.

As persoas interesadas poden consultar as datas e aulas participantes na web da Rede CeMIT, así como a localización dos centros.

Calendario de Aulas